Kosova është pozicionuar në fund të renditjes së vendeve pjesëmarrëse në testin ndërkombëtar PISA, që vlerëson njohuritë në lexim, matematikë dhe shkencë.
Nga rreth 80 vende, Kosova zë pozitat 74–77, varësisht nga fusha e testimit. Ky rezultat tregon një nivel të ulët të shkathtësive ndër nxënësit, të cilët hasin vështirësi në zgjidhjen e problemeve komplekse dhe në dallimin e fakteve nga opinionet.
Njohuritë shkencore shpesh mbeten në nivel teorik. Këto mangësi arsimore reflektohen edhe në tregun e punës.
Sipas një studimi të OECD-së në vitin 2025, sistemi arsimor dhe profesional i Kosovës është i dobët, duke e bërë të vështirë kalimin nga shkolla në punë. Programet mësimore shpesh janë të vjetruara dhe nuk përputhen me kërkesat ekonomike, ndërsa trajnimi praktik mbetet i kufizuar.
Punëdhënësit kanë vështirësi në gjetjen e punëtorëve të kualifikuar, dhe shumë të rinj punojnë në pozita që nuk korrespondojnë me arsimin e tyre. Kjo krijon një hendek midis arsimimit formal dhe përgatitjes reale për punë, duke çuar në analfabetizëm funksional.
Pa përmirësime në sistemin arsimor dhe lidhjen e tij me ekonominë reale, ky cikël problematik vazhdon, duke thelluar hendekun midis shkollës dhe jetës profesionale.
Leave a Reply