Kandidatja për deputete nga radhët e LDK-së, Hykmete Bajrami, ka bërë një deklaratë lidhur me projektet që synon të realizojë qeveria e tyre.
Ajo premton se në ditën e parë të qeverisjes do të publikohen të gjitha të dhënat për projektet në Kosovë, përfshirë datën e fillimit, afatet e parashikuara për përfundim dhe çdo vonesë të ndodhur gjatë zbatimit. Bajrami siguron se transparenca do të jetë në qendër të qeverisjes së tyre, ku çdo vonesë do të identifikohet me emra dhe përgjegjësi të qarta.
Ajo thekson se do të kërkohet llogaridhënie nga kontraktorët që nuk respektojnë afatet dhe gjithashtu nga zyrtarët shtetërorë që lejojnë bllokimin e projekteve përmes neglizhencës apo keqmenaxhimit. Në një kritikë ndaj VV-së, Bajrami vë në dukje se qytetarët janë të vetëdijshëm për situatën e rrugëve në Gjilan, Podujevë, Mitrovicë, Pejë dhe Tetovë, të cilat karakterizohen nga premtime të pambajtura dhe projekte të papërfunduara.
Ajo shton se situata e njëjtë ka ndodhur edhe me ndërtimin e stadiumeve dhe objekteve të tjera publike, ku janë shpenzuar fonde pa rezultat dhe pa mbajtje përgjegjësie. Bajrami premton se me qeverisjen e LDK-së do të nisë një epokë e re e llogaridhënies, duke i dhënë fund periudhës së justifikimeve.
Leave a Reply