Profesori i së drejtës kushtetuese, Mazllum Baraliu, ka deklaruar se Gjykata Kushtetuese e Kosovës duhet të refuzojë kërkesën e Listës Serbe lidhur me zgjedhjen e nënkryetarit të Kuvendit nga komuniteti serb, duke e cilësuar atë si të papranueshme.
Sipas Baraliut, një vendim ndryshe mund të rrezikojë funksionimin institucional të vendit dhe të ketë pasoja të pariparueshme. Në një intervistë në TV Dukagjini, Baraliu theksoi se Gjykata Kushtetuese duhet të veprojë me shpejtësi dhe qartësi, duke u bazuar në interesat e shtetit dhe stabilitetin institucional.
Ai argumentoi se shteti është në një fazë kritike për formimin e qeverisë së re dhe çdo vonesë mund të krijojë probleme serioze. Lista Serbe kishte dorëzuar ankesën më 16 tetor, duke pretenduar se zgjedhja e Nenad Rashiqit si nënkryetar i Kuvendit ishte bërë në kundërshtim me Kushtetutën dhe rregullat e Kuvendit.
Rashiq u zgjodh përmes shortit pasi kandidatët e Listës Serbe nuk arritën të sigurojnë votat e nevojshme. Ndërkohë, presidentja Vjosa Osmani ka mandatuar Albin Kurtin për formimin e qeverisë së re, duke nisur afatin kushtetues prej 15 ditësh, i cili skadon së shpejti.
Leave a Reply