Massimo Ferro, një biznesmen italian 54-vjeçar nga Camposampiero, ndërmori një hap të rëndësishëm për të trajtuar obezitetin, pas përpjekjeve të dështuara me dieta.
Ai zgjodhi një klinikë private në Milano që ofronte një zgjidhje kirurgjikale në Tiranë. Operacioni për ngushtim stomaku, i kryer më 18 dhjetor, rezultoi fatal, pasi ai ndërroi jetë më 22 dhjetor në Shqipëri.
Prokuroria e Padovës ka hapur hetime, duke regjistruar kirurgun Andrea Formiga dhe dietologen Alessandra Freda si të dyshuar. Autopsia e caktuar për të hënën do të kryhet nga mjeku ligjor Antonello Cirnelli.
Sipas të dhënave të publikuara nga Corriere, komunikimi i parë mes Ferro-s dhe kirurgut ndodhi në dhjetor përmes WhatsApp, ku u diskutuan detajet e operacionit me koston prej 4.400 euro, shumë më e ulët se në Itali. Gjatë vizitës së 6 dhjetorit, Ferro dhe djali i tij u informuan për procedurën dhe siguruan se do të përdorej teknika laparoskopike.
Familja e Ferro-s, e përfaqësuar nga avokatët Stefano Squarise dhe Jenny Lopresti, pretendon se nuk janë ndjekur protokollet e duhura mjekësore, duke përfshirë mungesën e një programi dietetik paraprak dhe vlerësimeve multidisiplinare. Pas operacionit, gjendja e Ferro-s u përkeqësua, duke çuar në vdekjen e tij.
Familjarët kërkojnë sqarime mbi shkaqet e vdekjes.
Leave a Reply