Një tërmet i lehtë, me magnitudë 3.2 sipas shkallës Rihter, ka tronditur sot zonën juglindore të Kosovës, veçanërisht rajonin Viti-Gjilan.
Sipas Shërbimit Gjeologjik të Kosovës, lëkundja u ndje rreth orës 07:20 sipas kohës lokale. Ndërsa, epiqendra ishte e lokalizuar në fshatin Vërmicë, 40 kilometra në juglindje të Prishtinës dhe 12 kilometra në jugperëndim të Gjilanit.
Thellësia hipoqendrore e tërmetit ishte 7 kilometra, por për fat të mirë, nuk raportohen dëme materiale ose të lënduar, duke qenë se intensiteti i lëkundjeve ishte relativisht i ulët, në IV-V ballë të Merkalit. Megjithatë, qytetarët e zonës kanë ndjerë dukshëm dridhjet.
Ky aktivitet sizmik është një shenjë e aktivitetit të vazhdueshëm në zonën sizmogjene Ferizaj-Viti-Gjilan, e cila është njohur për potencialin e saj sizmik. Këto të dhëna janë konfirmuar nga analiza të detajuara nga rrjeti sizmologjik dhe Qendra Sizmike Euro-Mediterane.
Leave a Reply