Deputeti i Lëvizjes Vetëvendosje, Enver Dugolli, ka reaguar ashpër ndaj deklaratave të fundit të Avni Klinakut për kryeministrin në detyrë, Albin Kurti.
Ai theksoi se, ndonëse Kurti nuk ka nevojë për mbrojtje, nuk mund të qëndrojë në heshtje përballë “gënjeshtrave të paskrupullta” të Klinakut. Dugolli shpjegoi se i njeh mirë të dy, si Klinakun ashtu edhe Kurtin, nga periudha të vështira ku secili provohej deri në kufijtë e ekzistencës fizike.
Ai nënvizoi se Kurti ishte një nga të burgosurit politik më të përgatitur dhe të vendosur për sakrificë. Në këtë kontekst, Dugolli vlerësoi qëndrueshmërinë e Kurtit dhe kritikoi Klinakun për përpjekjet e tij për të përbaltur figurën e Kurtit.
Sipas Dugollit, asnjë nga të burgosurit politik të asaj kohe, që e njohu Kurtin, nuk do të pajtohej me pretendimet e Klinakut. Ai vuri në dukje se respekti dhe dashuria e Kurtit për pjesëtarët e Ushtrisë Çlirimtare ishin të padiskutueshme.
Në fund, Dugolli sugjeroi se Klinaku kishte zili për integritetin dhe qëndresën e Kurtit, duke i bërë thirrje publikut të mos bien pre e këtyre gënjeshtrave.
Leave a Reply