Ferizajasit kërkojnë zgjidhje përfundimtare për qentë endacakë

Qytetarët e Ferizajt janë të shqetësuar për praninë e qenve endacakë në qytet, duke kërkuar një zgjidhje të qëndrueshme për këtë problem.

Gjithkund në Ferizaj mund të shihen këta qen, dhe ka pasur raste të sulmeve ndaj njerëzve. Banorët bëjnë thirrje për një angazhim të përgjithshëm në menaxhimin e situatës.

Sadush Ukshini, një qytetar, sugjeron se çdokush mund të marrë një ose dy qen për t’i strehuar, duke theksuar se qentë janë sjellë edhe nga fshatrat përreth dhe mbeten pa përkujdesje në rrugë. Një tjetër qytetar, Rexhep Sadiku, propozon krijimin e një plani të detajuar për strehimin e qenve, duke përfshirë edhe ndërtimin e një strehimoreje të përhershme.

Veterineri Kushtrim Rexhepi, i cili kujdeset për shëndetin e kafshëve, thekson se zgjidhja e kësaj çështjeje kërkon kohë, por rezultatet do të shihen me kalimin e kohës. Ndërkohë, bëhet thirrje që kafshët shtëpiake të mos braktisen.