Procesi i numërimit të votave për Kryetarë të Komunave dhe subjektet politike në zgjedhjet lokale është përmbyllur në 2,571 vendvotime të rregullta.
Sipas Valmir Elezit, zëdhënës i Komisionit Qendror të Zgjedhjeve, materialet zgjedhore nga 948 qendra janë transferuar në 38 qendra komunale për numërimin dhe verifikimin e votave për anëtarët e kuvendeve komunale. Ky proces, i cili përfshin numërimin dhe verifikimin e rezultateve nga formularët e plotësuar në vendvotime, ka nisur në tri komuna në orën 12:00 dhe në 35 të tjera në orën 16:00.
Për të siguruar një proces transparent, më shumë se 520 ekipe numërimi janë angazhuar, të përbëra nga mbi 2 mijë anëtarë. KQZ gjithashtu ka siguruar votimin me kusht dhe votimin për personat me nevoja të veçanta në 54 vendvotime, dhe për 43,933 kosovarë jashtë vendit përmes postës.
Numërimi i votave nga këto kategori do të realizohet në Qendrën e Numërimit dhe Rezultateve, pas përfundimit të procesit në qendrat komunale. Deri tani, janë mbledhur 2,119 zarfe nga votimi me kusht dhe 33,258 zarfe të supozuara nga votimi jashtë Kosovës.
Leave a Reply