Në Gjykatën Themelore në Prishtinë, të mërkurën, nisi procesi gjyqësor ndaj Muharrem Ibrajt, i akuzuar për krime lufte në fshatin Osek Hylë të Komunës së Gjakovës.
Seanca u zhvillua pa praninë e të akuzuarit. Pas leximit të aktakuzës nga prokurorja Ajshe Ferati, avokatja Sabrije Jashari, që përfaqëson të pandehurin, vendosi të mos paraqesë kundërshtime ndaj provave dhe kërkesë për hedhjen poshtë të aktakuzës.
Gjykimi vijoi me shqyrtimin e çështjes, ndërsa seanca e radhës pritet të mbahet në muajt e ardhshëm. Prokuroria Speciale e Republikës së Kosovës ka ngritur aktakuzë ndaj Ibrajt më 19 mars 2025, duke e akuzuar për krime lufte kundër popullsisë civile, duke përfshirë vrasjen e një civili dhe dhunimin e një viktime.
Aktakuza detajon ngjarjet e 28 shkurtit 1998, ku Ibraj, i shoqëruar nga forca policore serbe, akuzohet se ka marrë pjesë në vrasjen e një civili shqiptar dhe keqtrajtimin e të tjerëve. Gjykata ka vendosur që procesi të vazhdojë në mungesë të Ibrajt, i cili është në arrati.
Leave a Reply