Hajrulla Çeku ka reaguar pas fitores së Përparim Ramës në balotazhin për Prishtinën, duke i uruar atij sukses dhe duke shprehur shpresën që kryeqyteti të dalë nga kaosi aktual.
Në një mesazh drejtuar qytetarëve, Çeku e cilësoi eksperiencën e fushatës si të jashtëzakonshme dhe falënderoi të gjithë për mbështetjen dhe votat e dhëna për ndryshim. Ai theksoi se shumë njerëz dëshirojnë një Prishtinë më të mirë dhe kjo i jep motivim për të ardhmen.
Çeku premtoi të vazhdojë angazhimin për qytetin që e konsideron shtëpi, duke punuar nga pozita e opozitës në Kuvendin Komunal për të mbrojtur interesat e qytetarëve. Ai falënderoi ekipin e Lëvizjes VETËVENDOSJE!, aktivistët dhe vullnetarët për përkushtimin e tyre gjatë fushatës.
Mesazhi i tij përfundon me një premtim për të vazhduar rrugëtimin drejt një Prishtine më të mirë, duke ruajtur besimin dhe dashurinë për kryeqytetin.
Leave a Reply