Në një tubim elektoral të mbajtur në Vushtrri, kandidati për kryeministër nga PDK-ja, Bedri Hamza, prezantoi disa propozime për të ardhmen ekonomike të vendit.
Ai premtoi rritje të pagave dhe pensioneve me 50% dhe krijimin e një fondi për të mbështetur ata që humbin vendin e punës. Sipas tij, ky fond do të garantojë për gjashtë muaj pagesën e 80% të pagës së fundit për të papunët.
Hamza njoftoi gjithashtu krijimin e një gjykate të punës që do të mbrojë të drejtat e punonjësve në sektorin publik dhe privat. Ai theksoi se në fillim të mandatit të tij, do të rriten pagat për kategoritë si arsimtarët, mjekët dhe policët.
Gjatë fjalimit, Hamza kritikoi qeverisjen e Lëvizjes Vetëvendosje, duke vënë në dukje se premtimet e mëdha nuk janë përkthyer në rezultate të prekshme. Ai argumentoi se keqmenaxhimi ka sjellë kosto më të larta jetese dhe paqëndrueshmëri në furnizimin me energji, duke theksuar se qytetarët po paguajnë çmimin e kësaj qeverisjeje.
Leave a Reply