Autoritetet e Kosovës kanë nisur hetimet lidhur me dëmtimin e vagonëve të rinovuar të trenit “Trainkos”, të cilët u gjetën të vandalizuar me grafite në Stacionin Hekurudhor të Hanit të Elezit këtë të shtunë.
Incidenti u raportua nga një zyrtar i Infrakos-it më 15 nëntor 2025, ku persona të panjohur kishin shkaktuar dëme në dy vagona të udhëtarëve që ndodheshin në stacion që nga dhjetori 2024. Zëdhënësi i Policisë së Ferizajt, Kanun Veseli, konfirmoi se rasti është cilësuar si “Asgjësim apo dëmtim i pasurisë” dhe hetimet janë në vijim nga Njësia e Hetimeve.
Ndërkohë, kompania publike “Trainkos” ka kërkuar një hetim të detajuar dhe ndëshkim për përgjegjësit e këtij akti, duke theksuar se dëmet e shkaktuara që nga fillimi i projektit në vitin 2019 kanë tejkaluar 10 milionë euro. Kjo përfshin humbje në klientelë dhe imazh, si dhe zhvendosje të klientëve drejt transportit rrugor.
Sipas deklaratës së “Trainkos”, këto pasoja do të ndihen për një kohë të gjatë dhe rikuperimi i plotë mund të zgjasë disa vite, duke dëmtuar përpjekjet për modernizimin e shërbimeve hekurudhore.
Leave a Reply