Inspektorati mbyll 26 motele në Kosovë për shkelje rregullash

Inspektorati Qendror i Mbikëqyrjes së Tregut në Kosovë ka ndërmarrë masa ndaj 26 subjekteve ekonomike, duke i mbyllur përkohësisht.

Këto veprime janë kryer për shkak të mosregjistrimit të bizneseve dhe mungesës së dokumentacionit të nevojshëm për përmbushjen e kushteve teknike minimale, sipas njoftimit të Ministrisë së Industrisë, Ndërmarrësisë dhe Tregtisë (MINT). Gjatë inspektimeve, inspektorët e tregut kanë ndëshkuar me 27 masa subjektet që vepronin në kundërshtim me ligjet aktuale.

Në total, janë kontrolluar 69 subjekte, me një fokus të veçantë në sektorin e hotelerisë dhe turizmit. Inspektimet kanë përfshirë kryesisht subjektet që operojnë si vila dhe motele.

Qëllimi i këtij operacioni ka qenë mbikëqyrja më e gjerë e aktiviteteve ekonomike për të siguruar përputhshmërinë me legjislacionin në fuqi dhe për të garantuar standardet e nevojshme të operimit në këto fusha.