Departamenti i Hetimeve i Inspektoratit Policor të Kosovës ka rekomanduar pezullimin e katër zyrtarëve policorë nga Stacioni Policor i Podujevës.
Këta zyrtarë dyshohet se kanë tejkaluar autorizimet e tyre duke përdorur forcë të panevojshme. Sipas njoftimit të lëshuar nga IPK-ja, fillimisht informacionet për rastin janë marrë nga Policia e Kosovës.
Dyshohet se zyrtarët, gjatë kryerjes së detyrës zyrtare brenda zyrave të stacionit, kanë keqtrajtuar dy qytetarë, përfshirë një të mitur, të cilët ishin ndaluar. Hetimet ndaj këtyre zyrtarëve po vazhdojnë në bashkëpunim me Prokurorinë Themelore në Prishtinë.
Rastet po hetohen në procedurë të rregullt me dyshimin për “keqtrajtim gjatë ushtrimit të detyrës zyrtare ose autorizimeve publike”. Inspektorati Policor ka theksuar se hetimet do të vazhdojnë në konsultim të ngushtë me prokurorinë, duke ndërmarrë veprime shtesë për të sqaruar rrethanat e këtij incidenti.
Leave a Reply