Gjenerali Oskan Ulutaş, komandanti i KFOR-it, deklaroi se situata e sigurisë në Kosovë është e qetë, por mbetet e brishtë dhe e ndjeshme ndaj tensioneve të mundshme.
Në një intervistë për RTK2, ai theksoi se roli kryesor i KFOR-it është të sigurojë një mjedis të sigurt dhe liri lëvizjeje për të gjitha komunitetet, sipas mandatit të Kombeve të Bashkuara. Pas ngjarjeve të dhunshme të vitit 2023, NATO-ja shtoi 1.000 ushtarë, duke përforcuar misionin e KFOR-it, i cili tani numëron mbi 5.000 ushtarë.
KFOR-i ka një prani të dukshme në të gjithë Kosovën, përfshirë komunat me shumicë serbe, duke vendosur personel shtesë në pika strategjike si ura mbi lumin Ibër dhe pranë manastirit në Deçan. Ulutaş theksoi rëndësinë e dialogut për stabilitet afatgjatë, duke nënvizuar se stabiliteti nuk arrihet vetëm me mjete ushtarake, por kërkon dialog politik, veçanërisht ndërmjet Beogradit dhe Prishtinës me ndërmjetësimin e BE-së.
Ai vlerësoi bashkëpunimin e mirë me Ushtrinë e Serbisë, përfshirë patrullimet e përbashkëta dhe komunikimin e rregullt.
Leave a Reply