Kompanitë ndëshkohen me 1,000 euro për ndotje rrugësh në Prishtinë

Policia e Kosovës ka ndërmarrë veprime kundër disa kompanive të përfshira në punime me kamionë për transportin e dheut në zonën e Prishtinës.

Në një njoftim të fundit, është bërë e ditur se më 20 dhjetor 2025, ekipet e Trafikut Rajonal kanë kryer inspektime në terren dhe kanë gjetur sasi të konsiderueshme balte në disa segmente të rrugëve nacionale. Këto mbetje përbëjnë një rrezik të madh për sigurinë e trafikut, veçanërisht në kushte të vështira atmosferike si mjegulla dhe ngricat.

Si rezultat, kompanive përkatëse u janë vënë gjoba prej 1,000 euro, në përputhje me legjislacionin aktual. Ato janë urdhëruar gjithashtu që të pastrojnë menjëherë rrugët e ndotura.

Në një postim në Facebook, Policia e Kosovës ka theksuar angazhimin e saj për të vepruar pa hezitim gjatë sezonit dimëror kundër atyre që rrezikojnë sigurinë e trafikut dhe jetën e qytetarëve.