Buxheti i parashikuar prej rreth 7.8 milionë eurosh për zgjedhjet e parakohshme parlamentare të 28 dhjetorit nuk u miratua në takimin e fundit të Komisionit Qendror të Zgjedhjeve (KQZ).
Pas diskutimeve që zgjatën mbi një orë, u vendos që çështja e buxhetit të kthehet për rishqyrtim tek Këshilli i Buxhetit të KQZ-së dhe të dalë sërish për votim. KQZ ka caktuar një mbledhje për të martën në orën 13:30 për të diskutuar më tej këtë çështje.
Përfaqësuesit e partive opozitare si PDK, LDK dhe AAK kundërshtuan buxhetin, duke argumentuar se nuk përfshin zbatimin e nenit 9 të rregullores zgjedhore për votimin jashtë Kosovës. Ata theksojnë nevojën për të ndjekur rregullat e aplikuara në zgjedhjet e mëparshme lokale.
Ilir Gashi nga PDK theksoi rëndësinë e ruajtjes së integritetit të procesit zgjedhor, ndërsa anëtari i Vetëvendosjes, Alban Krasniqi, shprehu shqetësimin se dërgimi i fletëvotimeve me postë mund të mos arrijë në kohë, duke sugjeruar se kjo do të shkaktojë vonesa dhe probleme logjistike, veçanërisht në fund të vitit. Krasniqi gjithashtu përmendi se procesi mund të kalojë afatin e votimit, duke u kthyer në një situatë të pakëndshme për votuesit.
Leave a Reply