Kryeministri në detyrë i Republikës së Kosovës, së bashku me ministren në detyrë të Punëve të Jashtme dhe Diasporës, Donika Gërvalla, u takuan në New York me ministrin e Jashtëm të Sulltanatit të Omanit, Sayyid Badr bin Hamad bin Hamood Al Busaidi.
Kosova dhe Omani mbajnë raporte konstruktive, megjithëse nuk kanë marrëdhënie formale diplomatike. Kryeministria njofton se Kurti shprehu mirënjohjen për bashkëpunimin dhe mbështetjen e Omanit për anëtarësimin e Kosovës në organizata ndërkombëtare.
“Ai e informoi për progresin ekonomik dhe demokratik në Kosovë dhe për mundësitë që vendi ofron për investitorët e huaj. Gjithashtu, ai u shpreh i bindur për potencialin dhe përfitimet dypalëshe në fusha të tilla si partneriteti ekonomik dhe tregtar, bashkëpunimi kulturor dhe artistik, arsimi dhe turizmi.
Kryeministri ftoi ministrin Al Busaidi, së bashku me një delegacion të nivelit të lartë, për një vizitë zyrtare në Republikën e Kosovës, në mënyrë që të eksplorohen mundësitë e reja të bashkëpunimit, të cilat do të thellonin mirëkuptimin mes dy vendeve dhe popujve tanë”, thuhet në njoftim.
Kurti ndodhet në New York në kuadër të javës së nivelit të lartë të Asamblesë së Përgjithshme të Organizatës së Kombeve të Bashkuara. /Reporteri.net/
Leave a Reply