Pas konstituimit të Kuvendit të Kosovës me zgjedhjen e Nenad Rashiq si nënkryetar i pestë, Lëvizja Vetëvendosje i ka propozuar presidentes Vjosa Osmani emrin e Albin Kurtit për mandatar të Qeverisë së re.
Kushtetuta e detyron Kurtin të sigurojë shumicën prej 61 votash brenda 15 ditëve për formimin e institucioneve. Aktualisht, Vetëvendosje nuk ka arritur ende një marrëveshje koalicionare që do t’i siguronte votat e nevojshme për krijimin e qeverisë.
Pavarësisht takimeve me pakicat jo-serbe dhe bisedimeve me liderin e NISMA-s, Fatmir Limaj, nuk është arritur ndonjë marrëveshje konkrete, pasi Limaj kërkon garanci për votat përkatëse. Lidhja Demokratike e Kosovës ka refuzuar ftesat e Kurtit për bisedime, ndërsa Vetëvendosje përjashton bashkëpunimin me PDK-në.
Në Kuvend, Kurti ka mbështetjen e 56 deputetëve, përfshirë Rashiqin dhe komunitetet jo-serbe, por këto vota nuk janë të mjaftueshme për formimin e qeverisë së re. Presidentja Osmani ka mandatuar Kurtin të krijojë qeverinë, duke shpresuar në formimin e saj të shpejtë për të mirën e qytetarëve.
Hekuran Murati, ministri në detyrë i Financave, ka deklaruar se “Qeveria Kurti 3 po vjen”.
Leave a Reply