Kryeministri në detyrë i Kosovës, Albin Kurti, ka bërë të ditur se sulmi ndaj Kanalit të ujit Ibër–Lepenc më 29 nëntor 2024 synonte të zhvendoste krizën politike nga Beogradi drejt veriut të Kosovës.
Ai vuri në dukje se ky sulm ndodhi në një moment kritik, pas tragjedisë në Novi Sad ku humbën jetën 16 persona dhe pak para protestës së paralajmëruar në Beograd, duke argumentuar se kjo ishte një përpjekje për të krijuar paqëndrueshmëri në veri të Kosovës dhe për të ndalur përshkallëzimin e protestave në Serbi. Kurti akuzoi regjimin e Aleksandar Vuçiqit për përdorimin e metodave të njohura për të transferuar krizën e brendshme drejt Kosovës, duke ruajtur kështu stabilitetin e tij politik.
Ai theksoi se sulmi ndaj infrastrukturës kritike në Zubin Potok lidhet me aktorë shtetërorë serbë dhe struktura kriminale, duke përmendur përfshirjen e Millan Radoiçiqit. Në përfundim, Kurti apeloi për reagim ndërkombëtar ndaj këtyre veprimeve, duke kërkuar që të mos konsiderohen si incidente të izoluara, por si pjesë e një strategjie të qëllimshme për destabilizim.
Leave a Reply