Kryetari i Lidhjes Demokratike të Kosovës (LDK), Lumir Abdixhiku, ka njoftuar se vullnetarët e partisë do të shpërndajnë programin e tyre qeverisës në të gjithë vendin.
Ai e vlerësoi këtë program si më të mirin mes partive politike në Kosovë, duke theksuar rritjen e pagave për sektorin publik. Sipas tij, rreth 80 mijë punonjës do të përfitojnë nga kjo rritje, ku mësuesit do të marrin 1 mijë euro, policët dhe zjarrfikësit 900 euro, ndërsa mjekët 1 mijë e 200 euro.
Në planifikimet e LDK-së përfshihet edhe punësimi dhe trajnimi i 40 mijë të rinjve në sektorin e teknologjisë informative, duke garantuar punësim për të sapodiplomuarit me një pagë prej 500 euro për gjashtë muajt e parë. Programi gjithashtu përfshin përkujdesje për pensionistët, me rritje vjetore të pensioneve: 200 euro në vitin e parë, 250 euro në vitin e dytë dhe 300 euro në vitin e tretë.
Abdixhiku theksoi projektet zhvillimore si ndërtimin e një centrali të ri me gaz, stadiumit kombëtar të ri dhe spitalit të ri, si dhe përfundimin e autostradave dhe rrugëve kryesore të vendit. Ai ftoi për diskutime të fokusuara në programe, duke inkurajuar unitetin.
Leave a Reply