Në Ditën Ndërkombëtare Përkujtimore të Holokaustit, Kryeministri në detyrë, Albin Kurti, së bashku me presidenten Vjosa Osmani dhe Kryetarin e Kuvendit, Dimal Basha, vendosën kurora me lule për nder të viktimave të Holokaustit.
Ky akt përkujton të gjithë ata që humbën jetën nga plumbat, gazi, djegiet në krematoriume apo vdekjet në kampet e përqendrimit gjatë Luftës së Dytë Botërore. Në një deklaratë të publikuar në Facebook, Kurti theksoi se mizoritë e asaj periudhe i dhanë botës konceptin e gjenocidit, duke përkufizuar aktet e vrasjeve dhe shkatërrimeve sistematike kundër komuniteteve të caktuara etnike, fetare apo racore.
Kurti gjithashtu vuri në dukje se populli i Kosovës, i cili ka përjetuar vetë gjenocid, dëbime dhe krime kundër njerëzimit nga Serbia, ka treguar gjithmonë ndjeshmëri të veçantë ndaj popujve që kanë vuajtur të njëjtat fatkeqësi. “Duke kujtuar viktimat e Holokaustit, ne përpiqemi të mos harrojmë vuajtjet dhe të sigurohemi që ngjarje të tilla të mos përsëriten më,” përfundoi ai.
Leave a Reply