Ministria e Mbrojtjes së Kosovës ka mohuar çdo përfshirje në testimin e dronëve me emrin “Skifter 1” ose ndonjë dron tjetër, sipas një deklarate për VOX Kosova.
Ministria theksoi se, sipas njohurive të saj, asnjë institucion i Kosovës nuk ka marrë pjesë në ndonjë testim të tillë. Këto deklarata vijnë pasi Rdivan Aliu, pronar i “Future Minds Academy”, publikoi video në Facebook duke pretenduar se kompania e tij prodhon dhe shet dronë ushtarakë të testuar.
Megjithatë, më vonë u zbulua se videot ishin nga kompani kineze. Ministria sqaroi se autorizimi për fluturime në hapësirën ajrore të Kosovës është në duart e Komandantit të KFOR-it dhe ASHNA-s, dhe se nuk ka lëshuar asnjë leje për aktivitete të tilla.
Përveç kësaj, ministria po heton autenticitetin e videove dhe dronëve të përmendur. Në një garë për inovacion, organizuar nga ministria dhe Oda Ekonomike Amerikane, “Future Minds Academy” u vlerësua për prototipin e një droni me helika, por jo për atë që u prezantua si “Skifter K1”.
Leave a Reply