Ministrja e Jashtme në detyrë, Donika Gërvalla, mori pjesë në takimin ministror “Miqtë e Ballkanit Perëndimor” në Vjenë, ku apeloi për masa konkrete ndaj Serbisë pas incidentit në Banjskë dhe kërkoi heqjen e sanksioneve ndaj Kosovës.
Ajo theksoi domosdoshmërinë e ndërmarrjes së veprimeve të drejta lidhur me ngjarjen dhe përgjegjësit e saj. Gërvalla nënvizoi se sanksionet e padrejta kundër Kosovës duhet të anulohen, ndërsa sulmi paramilitar në Banjskë duhet të ketë pasoja për Serbinë dhe organizatorët, duke përfshirë Milan Radoiçiqin, i cili duhet të përballet me drejtësinë në Kosovë.
Ajo vuri në dukje edhe trajtimin e papërshtatshëm të qytetarëve kosovarë në kufi me Serbinë, duke e cilësuar si në kundërshtim me parimet evropiane dhe të drejtat bazë të njeriut. Gjithashtu, Gërvalla theksoi se dialogu me Serbinë duhet të rezultojë në njohje të ndërsjellë.
Ajo shprehu se siguria dhe perspektiva evropiane e Kosovës janë të pandara dhe kërkoi që BE-ja të ndërmarrë hapa konkretë në procesin e zgjerimit.
Leave a Reply