Kryetari i Prishtinës, Përparim Rama, ka njoftuar se transporti publik do të ndërpritet nga nesër, për shkak të problemeve me buxhetin.
Ndërkohë, ministri i Financave në detyrë, Hekuran Murati, ka sqaruar se Thesari ka lëshuar fondet e dhjetorit për Komunën e Prishtinës, me qëllim pagimin e faturave për shërbime jetike, si energjia elektrike. Sipas Muratit, punonjësit e komunës kishin përfunduar orarin e tyre të punës dhe nuk bënë pagesat, duke shtyrë për të hënën.
Murati shprehu habinë për këtë vonesë, duke vënë në dukje se urgjenca e kërkuar nga komuna nuk përputhej me veprimet e saj. Ai kritikoi kryetarin Rama dhe bashkëpunëtorët e tij për përpjekje për të krijuar propagandë kundër qeverisë gjatë fundjavës, duke mos paguar faturat në kohë.
Kjo situatë, sipas Muratit, është një taktikë për të krijuar përshtypje të gabuar në publik se qeveria është përgjegjëse për problemet financiare të komunës. Këto zhvillime ndërlikuan edhe votimin e buxhetit për Prishtinën në Kuvend.
Leave a Reply