Presidentja e Kosovës, Vjosa Osmani, ka theksuar rëndësinë e përfshirjes së grave në proceset e paqes dhe vendimmarrjes politike, duke pohuar se kjo çon në rezultate më të shpejta dhe të qëndrueshme.
Në një intervistë për “India Today”, ajo vuri në dukje rolin thelbësor që gratë luajnë në ndërtimin e paqes dhe stabilitetit. Osmani theksoi se prania e grave sjell perspektiva të reja dhe një qasje më bashkëpunuese në zgjidhjen e konflikteve.
Ajo u shpreh se paqja arrihet më shpejt dhe zgjat më gjatë kur gratë janë pjesë e proceseve vendimmarrëse. Në intervistë, Osmani ndau edhe përvojën e saj si udhëheqëse, duke pranuar se gratë përballen ende me sfida në politikë.
Megjithatë, ajo beson se përfaqësimi i tyre është vendimtar për një demokraci funksionale dhe institucione më të forta. Presidentja nënvizoi se Kosova është e përkushtuar ndaj barazisë gjinore dhe fuqizimit të grave, si në politikën kombëtare ashtu edhe në arenën ndërkombëtare, duke e parë këtë si një element kritik për paqe dhe zhvillim të qëndrueshëm.
Leave a Reply