Situata e përmbytjeve në Kosovë po përmirësohet ndjeshëm, pasi reshjet e shiut janë ndaluar dhe kanë filluar reshjet e borës.
Niveli i ujit në lumenjtë kryesorë po bie, duke mos paraqitur kërcënim të menjëhershëm për përmbytje të reja. Në Prishtinë dhe rrethinë, janë raportuar disa përmbytje lokale në nënkalime dhe bllokime rrugësh, por situata është nën kontroll.
Në Mitrovicën e Jugut, disa familje janë evakuuar përkohësisht për siguri, ndërsa në rajonin e Pejës janë kryer disa ndërhyrje, duke përfshirë evakuimin e një familjeje në Istog. Ndërkohë, situata në Gjakovë dhe Gjilan është e qetë dhe e menaxhueshme.
Njësitë e Shpëtimit dhe Zjarrfikjes janë të gatshme të ndihmojnë qytetarët, ndërsa sistemi emergjent 112 vazhdon monitorimin dhe koordinimin e situatës. Reshjet e borës dhe ngricat kanë shkaktuar vështirësi në disa rrugë, me disa segmente të bllokuara për shkak të rrëshqitjeve të dheut.
Agjencia e Menaxhimit Emergjent ka mbështetur me pajisje për largimin e ujit nga objektet e prekura. Qytetarët janë këshilluar për kujdes të shtuar.
Leave a Reply