Reshjet e shumta të shiut kanë përfshirë Shqipërinë që nga mbrëmja e kaluar, duke shkaktuar përmbytje në disa qytete.
Durrësi është zona më e goditur, ku në disa pjesë niveli i ujit ka arritur deri në 50 cm, veçanërisht në Spitallë, Nishtulla dhe ish-Kënetë. Shumë rrugë në qytet janë të pakalueshme, ndërsa mësimi është ndërprerë në shkollat e Durrësit për të shmangur rrezikun.
Në Shijak, tre nga tetë familje janë detyruar të evakuohen për shkak të përmbytjes së shtëpive. Ato janë strehuar në Konvaleshencën e Ministrisë së Brendshme.
Edhe autostrada Durrës-Tiranë është prekur rëndë nga uji, duke shkaktuar probleme në qarkullimin e automjeteve. Në Lezhë, reshjet kanë sjellë rritje të niveleve të lumenjve Drin dhe Mat.
Ndërkohë, në Kukës disa rrugë rurale dhe segmente nacionale janë dëmtuar nga uji. Fier gjithashtu ka përjetuar reshje intensive, por deri më tani nuk ka raportime për dëme serioze.
Për shkak të rritjes së prurjeve, hidrocentralet kanë nisur shkarkimet e kontrolluara për të menaxhuar situatën.
Leave a Reply