Ish-Presidentja e Kosovës, Atifete Jahjaga, ka vizituar Komandën e Forcave të Përbashkëta të NATO-s, që mbulon rajonet e Evropës, Lindjes së Mesme dhe Afrikës, pas ftesës së Admiralit Stuart B.
Munsch. Gjatë këtij takimi, u diskutua për integrimin e parimeve të Agjendës për Gratë, Paqen dhe Sigurinë në misionet e NATO-s, si aktuale ashtu edhe të ardhshme.
Në një postim në Facebook, Jahjaga vlerësoi kontributin e NATO-s dhe KFOR-it, që për më shumë se dy dekada kanë siguruar një mjedis të qetë dhe të sigurt për Kosovën. Ajo e cilësoi ndërhyrjen e NATO-s në vitin 1999 si çastin vendimtar që i dha fund vuajtjeve dhe hapi rrugën drejt lirisë së vendit.
Jahjaga gjithashtu theksoi rëndësinë e bashkëpunimit të vazhdueshëm midis Kosovës dhe NATO-s, duke nënvizuar se paqja ruhet jo vetëm me forcë, por edhe përmes vlerave demokratike dhe partneriteteve të qëndrueshme. Ajo vlerësoi Kosovën si një partnere të besueshme në promovimin e stabilitetit rajonal.
Leave a Reply