Komiteti për Punë të Jashtme i Kongresit amerikan ka avancuar një projektligj që kërkon nga Sekretari i Shtetit të përgatisë një raport të detajuar mbi trajtimin e shqiptarëve në Luginën e Preshevës nga autoritetet serbe.
Ky projektligj, i propozuar nga kongresisti Keith Self, ngre shqetësime për diskriminimin e vazhdueshëm të shqiptarëve në këtë rajon, veçanërisht për pasivizimin e adresave të tyre. Raporti i Komitetit të Helsinkit për të drejtat e njeriut i vitit 2021 alarmon për një mundësi të spastrimit etnik nëpërmjet procedurave administrative.
Nënkryetari i Komitetit, Gregory Meeks, ka kritikuar qeverinë serbe për mungesën e përgjegjësisë lidhur me krimet ndaj pakicave etnike. Shaip Kamberi, deputet shqiptar në Parlamentin serb, ka përshëndetur këtë vendim si një sukses të gjatëpritur, ndërsa kryetarja e Preshevës, Ardita Sinani, e ka quajtur një mesazh të qartë për drejtësinë.
Projektligji do të dërgohet në Dhomën e Përfaqësuesve për votim dhe më pas, nëse miratohet, do të kalojë në Senat për nënshkrim nga presidenti. Ai synon të adresojë çështje si pasivizimi i adresave dhe diskriminimi në përdorimin e gjuhës shqipe në institucione e arsim.
Leave a Reply