Studentët e organizatës “Fehmi Agani” kanë planifikuar të zhvillojnë një protestë paqësore të martën për të shprehur pakënaqësitë e tyre mbi, siç e quajnë ata, padrejtësitë në proceset gjyqësore në Hagë kundër ish-udhëheqësve të Ushtrisë Çlirimtare të Kosovës.
Protesta do të fillojë në orën 11:00 pranë konvikteve studentore në Gjakovë dhe do të vijojë me një marshim paqësor. Organizatorët kanë siguruar se ngjarja do të zhvillohet në mënyrë të qetë dhe të rregullt, sipas Klankosova.tv.
Qëllimi i manifestimit është të ngrihet zëri për mbrojtjen e identitetit dhe të drejtave të të akuzuarve, si dhe të sensibilizohet opinioni publik lidhur me atë që ata e konsiderojnë si trajtim të padrejtë ndaj figurave të larta të UÇK-së. Në të kaluarën, protesta në mbështetje të këtyre figurave janë mbajtur edhe në Prishtinë, Hagë, Tiranë dhe Strasburg, ndërsa protestat e ardhshme priten të zhvillohen në Shkup.
Leave a Reply