Rinumërimi i votave nga zgjedhjet e 28 dhjetorit ka zbuluar mospërputhje të konsiderueshme në rezultatet e kandidatëve, duke nxitur debate të gjera dhe kërkesa për hetime nga Prokuroria.
Mospërputhjet më të mëdha janë evidentuar në Prizren, ku rinumërimi i plotë ka çuar në heqjen e qindra e mijëra votave për disa kandidatë. Nga Lëvizja Vetëvendosje, Arbër Rexhaj ka humbur 631 vota, ndërsa Rea Krasniqi, Dafina Ismaili dhe Valon Ramadani kanë humbur përkatësisht 553, 459 dhe 422 vota.
Në Partinë Demokratike të Kosovës, Fetah Paçarizi është prekur më së shumti me mbi 6 mijë vota të hequra, ndërsa Nait Hasani dhe Kujtim Gashi me 3 mijë e 400 dhe 2 mijë e 300 vota përkatësisht. Edhe në Lidhjen Demokratike të Kosovës janë zbuluar mospërputhje të konsiderueshme, me Xhavit Ukën që ka humbur mbi 1 mijë e 500 vota.
Në Podujevë, megjithëse janë rinumëruar vetëm 10% e votave, disa kandidatë të VV-së kanë humbur qindra vota. Ndërkohë, në Dragash, Filiz Mustafa nga VV ka humbur 231 vota pas rinumërimit të plotë.
Mospërputhjet në partitë e tjera në këto zona janë më të vogla.
Leave a Reply