Në Komisionin Qendror të Zgjedhjeve u shprehën shpresat që pas rinumërimit të votave do të ketë më pak dilema mbi rezultatet, duke përshpejtuar kështu përfundimin e procesit zgjedhor.
Valmir Elezi, zëdhënës i KQZ-së, njoftoi se rinumërimi pritet të përfundojë këtë javë, me synim për të zvogëluar nevojën për ankesa. Deri në orën 16:00 të së dielës, është rinumëruar 65% e vendvotimeve.
Procesi ka përfunduar në komunat si Drenasi dhe Gjakova. Në Drenas, Fadil Demaku i PDK-së përfitoi 222 vota të shënuara gabimisht, ndërsa në Gjakovë Adonjeta Zymberi-Selmanci dhe Hajdar Beqa humbën përkatësisht 383 dhe 244 vota.
Në Gjilan, nga 130 kuti, vetëm 7 mbeten pa u rinumëruar, ndërsa diferencat më të mëdha evidentohen me 43 vota për Arijeta Rexhepin e LVV-së. Në Istog, janë rinumëruar 53 nga 62 kuti, me diferencën më të madhe prej 14 votash për Gani Dreshaj të AAK-së.
Deri tani, procesi ka përfunduar në 23 komuna, ndërsa 15 të tjera, përfshirë Prishtinën, janë ende në proces.
Leave a Reply