Rreth 185 ampula të dëmtuara në Spitalin e Gjilanit, hetime në zhvillim

Në repartin e oftalmologjisë të Spitalit të Gjilanit janë dëmtuar 185 doza ampula, të cilat po ruheshin në frigorifer.

Dyshohet se stafi përgjegjës nuk ka përmbushur detyrimet për ruajtjen e tyre sipas normave të përcaktuara. Ky dështim ka shkaktuar një dëm financiar të vlerësuar rreth 20 mijë euro, sipas raportit të Policisë së Kosovës.

Prokurori kompetent është informuar për rastin dhe ka klasifikuar veprën si “keqpërdorim i detyrës zyrtare”. Hetimet për këtë ngjarje janë në proces, siç konfirmohet në raportin 24-orësh të policisë.

Ngjarja ka ndodhur më 31 dhjetor 2025, në rrugën Idriz Seferi në Gjilan. Organet e drejtësisë po punojnë për të zbardhur shkaqet e këtij incidenti dhe për të përcaktuar përgjegjësitë e stafit të përfshirë.