Prokuroria e Lartë Publike në Suboticë të Serbisë ka pezulluar hetimet ndaj Arbnor Spahiut, ish-pjesëtar i Njësisë Speciale të Policisë së Kosovës, i dyshuar për “vrasje të rëndë” në Banjskë të Zveçanit.
Urdhri për pezullim është lëshuar më 21 nëntor për mungesë provash, sipas konfirmimit nga Zyra e Prokurorit për Radion Evropa e Lirë. Spahiu, i arrestuar më 7 qershor në kufirin mes Hungarisë dhe Serbisë, është mbajtur për pesë muaj në paraburgim serb.
Avokati i tij, Arianit Koci, ka deklaruar se ai është liruar dhe kthyer në Kosovë më 21 nëntor, duke theksuar se Spahiu nuk ka qenë pjesë e Policisë së Kosovës gjatë incidentit të akuzuar. Ngjarja ka ndodhur në shtator 2023, kur një grup serbësh të armatosur sulmuan Policinë e Kosovës dhe vranë policin Afrim Bunjaku.
Millan Radoiçiq, ish-nënkryetar i Listës Serbe, e ka marrë përgjegjësinë për sulmin. Autoritetet në Kosovë po zhvillojnë gjyqin për tre nga 45 të pandehurit, ndërsa kërkojnë dorëzimin e Radoiçiqit, i cili është liruar në Beograd me ndalesë udhëtimi.
Leave a Reply