SHBA kërkon llogaridhënie nga Beogradi për diskriminimin në Preshevë

Deputeti shqiptar në Parlamentin e Serbisë, Shapi Kamberi, ka shprehur reagimet e tij pas miratimit të rezolutës H.R.

6411 nga Komiteti për Punë të Jashtme i Kongresit të SHBA-ve, e cila adreson të drejtat etnike të shqiptarëve në Luginën e Preshevës. Kamberi e konsideron këtë rezolutë si një qëndrim të qartë të SHBA-ve kundër diskriminimit sistematik dhe një hap drejt kërkimit të përgjegjësisë nga Serbia.

Ai e ka cilësuar këtë zhvillim si rezultat të një angazhimi të gjatë që nga viti 2001, nën ndihmën e vazhdueshme të personaliteteve si Joe dhe Shirley DioGuardi dhe të Ligës Qytetare Shqiptaro-Amerikane. Kamberi ka shprehur mirënjohje për kongresistin Keith Self dhe mbështetjen dypartiake të Komitetit të Kongresit, duke përmendur se rezoluta pritet të miratohet edhe nga Kongresi.

Gjithashtu, ai ka vlerësuar rolin e komunitetit shqiptar në Teksas, veçanërisht organizatën Albanians For America, dhe mbështetjen e Qeverisë së Kosovës. Kamberi e përshkruan këtë si një fitore të rëndësishme për shqiptarët e Luginës.