SHSKUK: Masa për të adresuar mungesën e materialeve të dializës

Shërbimi Spitalor dhe Klinik Universitar i Kosovës (SHSKUK) ka adresuar shqetësimet për mungesën e materialeve të nevojshme për shërbimin e dializës në nivel kombëtar.

Në një reagim zyrtar, SHSKUK pranon se ka pasur vështirësi në furnizim, por thekson se janë ndërmarrë hapat e nevojshëm për të siguruar që këto probleme të zgjidhen. Sipas deklaratës, shërbimet e dializës po vazhdojnë normalisht si në Qendrën Klinike Universitare të Kosovës, ashtu edhe në spitalet e tjera të përgjithshme.

Ata sigurojnë se pacientët po marrin trajtimin e tyre të zakonshëm dhe nuk ka pasur ndërprerje apo vonesa në ofrimin e shërbimeve. SHSKUK informon se aktualisht ka mjaftueshëm materiale për të zhvilluar seancat e dializës dhe se janë ndërmarrë të gjitha masat për të siguruar stabilitet të plotë në furnizim.

Kjo deklaratë vjen pas raportimeve të ndryshme, shpesh të pavërtetuara, lidhur me gjendjen e furnizimit.