Investitori i njohur Radosh Petroviq po përballet me akuza ligjore pasi Inspektorati i Ndërtimit në Kragujevc ngriti kallëzim penal ndaj kompanisë së tij “RP Invest 1980”.
Ky veprim erdhi pas shembjes së një muri mbajtës dhe një pjese të rrugës në kantierin e tij, pranë Qendrës së Ekselencës, pavarësisht ndalimit zyrtar të punimeve që prej 21 nëntorit. Kompania e tij, e cila figuron në pronësi të Jelena Petroviqit, por drejtohet nga Radosh Petroviqi sipas raportimeve të revistës NIN, është përfshirë në projekte të shumta milionëshe në veri të Kosovës, të financuara nga Serbia.
Këto projekte përfshijnë ndërtimin e njësive banimi dhe infrastrukturës publike. Nga regjistrimet zyrtare, kompania ka parë një rritje dramatike nga 11 milionë dinarë në vitin e parë të regjistrimit në mbi 1.86 miliardë dinarë në vitin 2024, duke ngritur pikëpyetje mbi burimet e kësaj rritjeje.
Petroviqi është përmendur gjithashtu në kontekste të ndjeshme politike në veriun e Kosovës, përfshirë ngjarjet e majit 2023 në Zveçan.
Leave a Reply