Sinisha Karan është shpallur si kandidati i Aleancës së Social-Demokratëve të Pavarur për zgjedhjet e parakohshme presidenciale në Republikën Sërpska, Bosnje-Hercegovinë, njoftoi kryetari i partisë, Millorad Dodik.
Dodiku, ish-president i këtij entiteti serb në Bosnje, deklaroi për Radio-Televizionin RS se Karan do të propozohet për partnerët e koalicionit.
Karan ndodhet në listën e zezë të Departamentit të Thesarit të SHBA-së, për pjesëmarrje në organizimin e festave jokushtetuese të Republikës Sërpska.
Ai është profesor i çështjeve kushtetuese dhe ministër për Zhvillim Teknologjik dhe Shkencor në qeverinë jokushtetuese të Republikës Sërpska.
Zgjedhjet e parakohshme janë caktuar për 23 nëntor, pasi Gjykata e Bosnje-Hercegovinës i revokoi mandatin Dodikut, pas një vendimi përfundimtar për mosrespektim të vendimeve të Përfaqësuesit të Lartë ndërkombëtar.
Vendimi i gjykatës e ndalon atë të mbajë ndonjë pozitë publike për gjashtë vitet e ardhshme.
Partia e Dodikut fillimisht deklaroi se nuk do të kishte kandidat për zgjedhjet, por më vonë vendosi të marrë pjesë.
Partia më e madhe opozitare, Partia Demokratike Serbe, deklaroi se kandidati i saj do të jetë Branko Bllanusha, profesor në Fakultetin e Inxhinierisë Elektrike në Banjallukë./rel
Leave a Reply