Suedia propozon dënime për 13-vjeçarët kundër krimit të organizuar

Suedia ka prezantuar plane për të përfshirë të rinjtë që kanë kryer krime të rënda, duke filluar nga mosha 13 vjeç, në qendrat e paraburgimit.

Këto masa do të hyjnë në fuqi nga vera e ardhshme, edhe pse adoleshentët e kësaj moshe nuk janë ligjërisht përgjegjës për shkak të moshës. Kjo nismë vjen pas një periudhe të gjatë ku bandat kriminale kanë rekrutuar të mitur për të kryer krime të rënda, përfshirë vrasjet.

Ministria suedeze e Drejtësisë ka bërë të ditur se do të krijohen seksione të veçanta për të rinjtë e moshës 13 deri në 17 vjeç në qendrat e paraburgimit, të cilat pritet të jenë funksionale deri në korrik 2026. Seksionet për djemtë do të krijohen në gjashtë qendra, ndërsa dy të tjera do të jenë për vajzat.

Qeveria liberale-konservatore e kryeministrit Ulf Kristersson synon të ndryshojë legjislacionin aktual për të ulur moshën e përgjegjësisë penale në rastet e krimeve të rënda. Ministri i Drejtësisë, Gunnar Strommer, theksoi rëndësinë e këtyre masave për mbrojtjen e shoqërisë dhe për të ndihmuar të rinjtë të shmangin rrugën e krimit.