I dërguari i posaçëm i Bashkimit Evropian për dialogun Kosovë–Serbi, Peter Sorensen, vizitoi Prishtinën duke shpresuar në formimin e shpejtë të institucioneve të reja në Kosovë pas zgjedhjeve të fundit.
Në takimin me presidenten Vjosa Osmani, Sorensen theksoi rëndësinë e rinisjes së dialogut me Serbinë, pas një periudhe bllokade institucionale. Sorensen shprehu dëshirën që viti 2026 të sjellë avancime të rëndësishme në procesin e dialogut, duke nënvizuar nevojën që të dyja palët të angazhohen në bisedime kur të jetë koha e duhur.
Presidentja Osmani, nga ana e saj, deklaroi se dialogu duhet të fokusohet në njohjen reciproke, duke theksuar se Serbia ka shkelur në mënyrë të vazhdueshme marrëveshjet ekzistuese. Kryeministri në detyrë, Albin Kurti, gjatë takimit me Sorensenin, theksoi rëndësinë e përfaqësimit të drejtë të Kosovës në dialog dhe kërkoi tërheqjen e letrës së ish-kryeministres Bërnabiq, si dhe dorëzimin e Millan Radojçiqit.
Pas vizitës në Prishtinë, Sorensen vazhdoi udhëtimin në Beograd për bisedime me udhëheqësit serbë.
Leave a Reply