Në një diskutim të fundit në Komitetin për Politikë të Jashtme të Dhomës së Përfaqësuesve të SHBA-së, u theksua nevoja për një angazhim më të madh të administratës së presidentit Donald Trump në Ballkanin Perëndimor për të ruajtur stabilitetin.
Kryetari republikan i Nënkomitetit për Evropën, Keith Self, vuri në dukje paqëndrueshmërinë e rajonit, duke e cilësuar atë si më të paqëndrueshmin në Evropë pas Ukrainës. Marrëdhëniet e tensionuara mes Serbisë dhe Kosovës janë identifikuar si faktorë kryesorë të destabilitetit, duke i dhënë mundësi Rusisë të minojë përpjekjet e BE-së dhe NATO-s në rajon.
Self theksoi se në rast konflikti, aleatët e NATO-s si Shqipëria, Maqedonia e Veriut dhe Mali i Zi do të përballen me rrezik, ndërsa Kosova mbetet jashtë aleancës perëndimore. Kina dhe Rusia po shfrytëzojnë dobësitë e rajonit për të rritur influencën e tyre, tha Self, duke përmendur marrëveshjet ekonomike dhe stërvitjet ushtarake të Kinës në Serbi.
Nga ana tjetër, William R. Keating, anëtari demokrat, kritikoi administratën Trump për heqjen e sanksioneve ndaj politikanëve serbë problematikë dhe theksoi rëndësinë e mbështetjes amerikane për të ardhmen e Bosnjës.
Ekspertët të tjerë, si Max Primorac dhe Edward P. Joseph, theksuan rëndësinë e një qasjeje më të fortë amerikane për të kundërshtuar ndikimin rus dhe kinez, duke nënvizuar se stabiliteti afatgjatë në Ballkan kërkon një Serbi të orientuar drejt Perëndimit dhe normalizim të marrëdhënieve me Kosovën.
Leave a Reply