Disa muaj pasi Donald Trump transformoi kolonadën në Krahun Perëndimor të Shtëpisë së Bardhë në një “Shëtitore presidenciale të famës”, ai ka shtuar pllaka me përmbajtje subjektive dhe politike, duke ripërcaktuar më tej estetikën dhe narrativën historike të rezidencës presidenciale.
Në këtë ekspozitë përfshihen pllaka për ish-presidentë të ndryshëm, ku kritikohen hapur Joe Biden, Barack Obama dhe George W. Bush.
Pllaka që i referohet Bidenit përmban pretendime të kontestuara për zgjedhjet e 2020 dhe e cilëson atë si “presidentin më të dobët në historinë amerikane”. Obama, si presidenti i parë me ngjyrë, përshkruhet si “një nga figurat më përçarëse”.
Ndërkohë, për George W. Bushin, ndërsa miratohet krijimi i Departamentit të Sigurisë Kombëtare, kritikohet për luftërat në Afganistan dhe Irak.
Sekretarja e shtypit e Shtëpisë së Bardhë, Karoline Leavitt, theksoi se pllakat përmbajnë “përshkrime të shkruara me elokuencë”, shumë prej të cilave janë hartuar nga vetë Trump. Kjo ekspozitë ndodhet midis rezidencës dhe Zyrës Ovale, duke i ofruar Trumpit mundësinë për të shoqëruar mysafirë në këtë “tur” personal.
Pllaka hyrëse pohon se “Shëtitorja presidenciale e famës” do të mbetet si një dëshmi e madhështisë amerikane edhe pas largimit të Trumpit.
Leave a Reply