Kosova ka pranuar një dërgesë me dronë luftarakë kamikazë të tipit Skydagger, njoftoi kryeministri në detyrë, Albin Kurti.
Ai theksoi se këta dronë, të cilët ishin planifikuar të mbërrinin në janar 2026, kanë mbërritur tre muaj më herët. Kurti shtoi se disa ushtarë të Forcës së Sigurisë së Kosovës janë trajnuar tashmë për përdorimin e tyre.
Kontrata për këta dronë ishte nënshkruar me kompaninë turke Baykar, prodhuesi i Skydagger, në dhjetor të vitit të kaluar. Dronët janë të pajisur me mjete shpërthyese dhe janë të përshtatshëm për sulme kundër shënjestrave të lëvizshme dhe statike.
Presidenti i Serbisë, Aleksandar Vuçiq, kritikoi Turqinë për këtë marrëveshje, duke e akuzuar për shkelje të Kartës së Kombeve të Bashkuara dhe Rezolutës 1244 të Këshillit të Sigurimit të OKB-së. Ai e konsideroi këtë veprim si destabilizues për Ballkanin Perëndimor.
Forca e Sigurisë së Kosovës është në proces transformimi në ushtri që nga viti 2018, ndërsa mbështetja nga Shtetet e Bashkuara ka qenë e vazhdueshme, me pajisje dhe trajnime të ndryshme ushtarake.
Leave a Reply