Komisionerja Evropiane për Zgjerim, Marta Kos, ka bërë të ditur në Bruksel se Serbia ka arritur të përmbushë kriteret teknike për hapjen e kapitujve të rinj negociues me BE-në.
Megjithatë, përparimi i saj drejt anëtarësimit është i kushtëzuar nga zbatimi i detyrimeve politike, përfshirë zgjidhjen e çështjes “Banjska.”
Në Forumin e Zgjerimit të BE-së, Kos theksoi rëndësinë e përmbushjes së këtyre detyrimeve. Ajo nënvizoi se Serbia duhet të tregojë përparim në lirinë e medias dhe atë akademike për të ecur përpara në procesin e integrimit.
Kos kritikoi politikën e dyfishtë të Beogradit, e cila përfshin marrëdhënie të ngushta me Rusinë, veçanërisht në kontekstin e konfliktit në Ukrainë. Ajo vuri në dukje dhënien e shtetësisë serbe qytetarëve rusë të sanksionuar dhe pjesëmarrjen e ushtrisë serbe në stërvitjet ruse si pengesa të mëdha për integrimin evropian.
Kos kërkoi nga liderët serbë të përfundojnë retorikën anti-evropiane dhe të forcojnë besimin e popullit në integrimin europian. Ajo po ashtu shtoi se BE-ja është e gatshme të mbështesë Serbinë në krizën energjetike dhe transformimin e saj, por theksoi se shkëputja nga varësia ndaj Rusisë është e domosdoshme.
Leave a Reply